حد فاهم حاجة ! ؟

س1: أشرح شكل العلاقات الحسية المتبادلة و الغير الحسية الإنسانية غير المتبادلة , اعتماداً علي الوعي و اللاوعي , مع الإشارة إلي وجهة نظرك الخاصة ؟
س2: العالم العلوي الروحاني و السفلي غير الروحاني و الحقبة الأولي و الثانية من الزمان و كذلك العصور الوسطي , كانوا جمعياً من دوافع أحداث 11سبتمبر , وضح مع التدليل بأمثلة ؟
س3 : ماذا يحدث لو لم تنهزم القوات الألمانية علي الحدود الغربية المصرية , أشرح مع إعطاء وجهة نظرك في دور الإمبريالية في تمزيق الوطن العربي إرباً إرباً ؟ "مع الرسم"

فضلت أفكر كتير ما سر العلاقة الزبالة بين المُعلم و المُتعلم , لماذا ينظر الأول لناني علي أنه تافه و ساذج و غبي ( حمار ) , ولماذا ينظر الناي للأول علي أنه معقد و نكدي و رخم ( وبرضه حمار ) , عدا إستثناءات قليلة ... فتوصلت أخيراً إلي تحليل لتلك العلاقة القائمة علي التربص و الشك و الكراهية , وايضاً تحليل لحكاية ( الحمار ) دي .

* و لنبدأ بالأول _ المعلم _ : فهو ينظر دائماً إلي سنين عمره اللي راحت في العلم و التعلم , ويبكي علي نظره اللي ضاع في قراءة الكتب , و دمه اللي اتحرق و فلوسه اللي اتبعطرت لحد ماوصل للي هو فيه , فيفاجأ بانه أصبح مجرد موظف أد الدنيا , يلم كتبه و يروح الصبح للحمير اللي بيدرسلهم , و يرجع اخر النهار الجرنال في ايده , و اخر الشهر الكام جندي اللي بيخدهم واللي بيخلصه يوم 20 في الشهر , فوجئ بحياة سوداء و حائط سد قطع عليه أحلامه و طموحاته , إضافة لذلك । منظر طلاب المستقبل اللي قصاده , اللي عاملي ذبيكي و فرحان بشعر صدره , و اللي مبحلق في صاحبته , واللي واكل ودن اللي جانبه , فبصراحة ليه حق يتخنق و يتجنن و يعتبرهم شوية ( حمير ) .

* و نيجي للتاني _ المتعلم _ : الحياة معقربة معاه و طلعان عينه _ من وجهة نظره طبعاً _ , فالمدرسة و لا الجامعة خنقة و البيت أخنق , و كل واحدة يحبها و يفتكرها ليلي بتسيبه في أول محطة , و أهله مكحرتينه حبتين في الفلوس و الحياة زفت خالص , وغير الحاجات دي _ اللي في وجهة نظرة أضلع من الأزمة السياسية الصومالية _ يجي الغبلان يقرر أنه يذاكر و يلتزم فيسحق في الإمتحان بسؤالين من عينة التلاتة اللي فوق دول , فبصراحة ليه حق يتخنق ويتجنن و يكره الحياة و يعتبر معلمه برضه ( حمار ) ! .

الملخص : " الأزمة تنحصر في ضعف المستوي الثقافي و الاقتصادي للدولة عامة "

( إمام أحمد )