هو ده بجنيه فول يا ولا , يا حاجة الجنيه بقي يجيب حاجة , ليه يا حزين لغوه. حُط شوية كمان , أهوت يا حاجة , أهوت ايه . أنت حطيت حاجة , أشيلك الأدرة يا ستي بالجنية بتاعك , أدرة ! كتك أدرة فوق نفوخك . هات هات . والنبي يابني اديني بقي بنص جنيه جبنة من اللي أودامك دي , بتاعة البلية في الحارة اللي ورانا يا ست , بليلة ! سفخس عليك . بتتريق عليا يابن نسعده . طب وحياة أمك ما جاية عندك تاني , احسن برضه تريحينا....
يا واد يا عبده أنا جيت . هات رغيفين و حضر الفول ع ناكل , احط زيت ياما , ماهو عليه زيت , عليه ايه أنتي بتشتغليني , يادي النصيبة السودا . وحياة امك مافي نقطة زيت هاتتحط . الزيت غلي و امك بتكح تراب . هاتاكل ولا أرجعه , خلاص خلاص هاكل ,
طب أفتح التليفزيون كدة . عزو زمنها هاتشتغل . أيون أهي بدأت أهي , بدأت ايه ياما . ده مجلس الشعب . لسة هي بعده , أممم . مين أبو دماغ بتلمع ده يا واد , ده وزير المالية ياما . بيقول حققنا نمو و إزدهار في الإقتصاد , نمو و إزدهار ! و شرف أم عبده ليروح جهنم في ميكروباص , و مين اللي شبه السقا ده يا واد , ده ابن الريس ياما , ابن الريس ! أطفي يا ولا . هايبقي الواد و أبوه , و عزو ياما , بلا عزو بلا زفت . انا دمي اتحرق خلاص . و شيل طبق الفول ده ....
بقولك ايه يام عبده , قول يا روح أم عبده , أنا عايز أخطب صاحبتي في الجامعة , ههههه واسمها ايه بقي صاحبتك دي , اسمها عفاف , لا يابني هي هي مش امها , ايوه ياما هي اسمها عفاف . أنتي بتتريقي . قولتي ايه , قولت اتوكس علي وكسة اللي جايبينك . بقولك بكح تراب و قطران علي دماغ اللي جايبك و تقولي عايز اخطب . ياربي هو الاهبل هايجيب ايه ”مفتش تومين“ ماهو لازم يجيب اهبل برضه . أدخل يا واد ذاكر و شيل الحكاية دي من نفوخك....
أتأخرت ليه النهاردة يابو عبده , أصل كان في شغل كتير شوية , فين عبده , نايم في اوطه , طب كويس , هو النهاردة ايه يا عفاف , قول أم عبده أحسن . النهاردة الخميس , منا عارف , طب مالك مبتسم كدة , تعالي جنبي ونا اقولك , اه علي فكرة القبض خلص , يادي الليلة السودا . ياولية ده وقته , ونا مالي يا خويا ناكل منين مبقاش في فلوس خلاص , طب ونا كمان اعمل ايه . علي يادك اهو جاي في نص الليل , ماعرفش أشتغلك شغلانة كمان , يابنت الصارمة بقولك جاي في نص الليل . أشتغل شغلانة كمان و بلاش أجي خالص . أبعتلك القبض في البوستة , أنا كل ما أجبلك سيرة الفلوس تعلي صوتك كدة . أنا خارجة أنام مع الواد , تعالي يا عفاف رايحة فين. النهاردة الخميس , بلا عفاف بلا زفت. خمس مع نفسك بقي , اه يا بوذ البومة يا نكدية .....
( إمام أحمد )
هناك تعليق واحد:
ههههههههه نكديه اوى ام عبد دى ياموووووووم بس بجد حلوه ربنا معاك ياموم كل ده شايله فى قلبك هههههههه
إرسال تعليق